Një incident i rëndë ka tronditur qendrën e Stokholmit të premten pasdite, kur një autobus urban ka humbur kontrollin dhe është përplasur drejtpërdrejt në stacionin e autobusëve në lagjen e njohur Östermalm. Përplasja ka shkaktuar plagosjen e disa personave, ndërsa autoritetet suedeze e kanë cilësuar ngjarjen si një situatë serioze emergjente.
Sipas gazetës lokale Aftonbladet, aksidenti ndodhi gjatë orarit të pikut të trafikut, rreth orës 15:30 me orën lokale, çka krijoi kaos të menjëhershëm në zonë. Pamje nga vendngjarja treguan ekipe të shumta zjarrfikësish, ambulanca dhe forca policie duke u përpjekur të menaxhonin situatën dhe t’u jepnin ndihmë të plagosurve.
Policia ka bërë të ditur se rasti është hapur si hetim për “vrasje nga pakujdesia”, ndërsa aktualisht po analizohen të gjitha rrethanat që çuan në humbjen e kontrollit të autobusit. Ende nuk dihet nëse ngjarja lidhet me një defekt teknik, gabim njerëzor apo faktorë të tjerë.
Zëdhënësja e Transportit të Stokholmit, Sophie Gunnarsson, e përshkroi përplasjen si “një incident serioz”, duke shtuar se shërbimet e transportit janë duke bashkëpunuar ngushtë me autoritetet për të sqaruar shkaqet.
Nga ana tjetër, Oscar Davila, menaxher operativ i shërbimit të shpëtimit, konfirmoi se ka disa persona të lënduar, përfshirë edhe të plagosur rëndë, por numri ende nuk është bërë publik zyrtarisht.
Hetimet po vijojnë, ndërsa zona mbetet e rrethuar deri në vlerësimin e plotë të sigurisë.
Leave a Reply