Qindra njerëz u evakuuan nga një qytet në Oklahoma dhe të tjerëve iu kërkua të qëndronin në vendstrehim pasi një kamion-cisternë që po rridhte në një parking hoteli lëshoi një re gazi amoniaku anhidrik, thanë autoritetet të enjten.
Urdhri për qëndrimin në vendstrehim u hoq pasi niveli i cilësisë së ajrit arriti në nivele të sigurta të enjten në mëngjes, sipas Policisë së Weatherford-it.
Lëshimi i gazit ndodhi pak para orës 10 të mbrëmjes të mërkurën. Njerëzit në zonën e afërt kishin vështirësi në frymëmarrje dhe të paktën 36 persona u dërguan në një spital lokal, thanë zyrtarët e qytetit në një konferencë për shtyp.
Pesë persona u transportuan me helikopter në një spital në Oklahoma City, rreth 70 milje (rreth 110 kilometra) në lindje, tha Shefi i Policisë së Weatherford-it, Angelo Orefice.
Shumica e viktimave ishin në hotelin ku ndodhi rrjedhja, tha ai, por disa ishin nga një shtëpi e afërt për të moshuar. Policia po flet me shoferin dhe do të hetojë se çfarë shkaktoi rrjedhjen, shtoi Orefice.
Departamentet e zjarrfikësve dhe të policisë iu përgjigjën incidentit, dhe një ekip i mbrojtjes nga materialet e rrezikshme i Gardës Kombëtare ishte në vendngjarje, tha Orefice. Zona u bllokua në një perimetër prej një milje katrore.
Të paktën 500 deri në 600 persona ndodheshin në një vendstrehim për shkak të evakuimeve të enjten në mëngjes, thanë autoritetet. Tre hotele, dy shtëpi pleqsh, një lagje e afërt dhe një qendër tregtare u evakuuan. Shkollat u mbyllën për ditën si masë paraprake sigurie, shtoi Orefice- Raporton CNN
Leave a Reply